Lögreglustjóri situr fyrir svörum

Rætt verður um réttarstöðu borgara í samskiptum sínum við yfirvaldið á umræðufundi í Bíó Paradís í dag. Brynjar Níelsson mun flytja inngangserindi um réttindi borgaranna gagnvart yfirvöldum og hvernig framkvæmdin hefur þróast. Stefán Eiríksson, lögreglustjóri á höfuðborgarsvæðinu, gerir svo afstöðu lögreglunnar skil og geta fundargestir spurt spurninga úr sal.

Í tilkynningu segir að Brynjar muni fjalla um réttindi borgaranna gagnvart yfirvöldum sem tryggð eru í stjórnarskrá og hvernig framkvæmdin hefur þróast. Hvort löggjafinn, stjórnvöld og dómstólar hafi víkkað mjög út almannahagsmunahugtakið á kostnað grunnréttinda einstaklingsins.

Aðrir þátttakendur eru Helgi Hrafn Gunnarsson, alþingismaður, og Aðalheiður Ámundadóttir, starfsmaður Alþingis, en hún mun einnig sjá um fundarstjórn.

Mögulegt er að senda spurningar undir nafnleynd en frekari upplýsingar er hægt að sjá á Facebook síðu viðburðarins.