Wilshere frá í sex vikur eftir tæklingu Aggers

Jack Wilshere, miðjumaður Arsenal, verður frá í einn og hálfan mánuð vegna meiðsla sem hann hlaut í vináttulandsleik Englands og Danmerkur í gærkvöldi.

DanielAgger, varnarmaður Liverpool og danska landsliðsins, tæklaði Wilshere í leiknum í gær með þeim afleiðingum að sprunga kom í fót Wilshere.

Arsenal tilkynnti það á heimasíðu sinni í dag að Wilshere getur ekki verið með liðinu næstu sex vikurnar sem er mikið áfall fyrir liðið.

Arsenal er eins og flestir vita í harðri toppbaráttu í ensku úrvalsdeildinni en liðið er í þriðja sæti, fjórum stigum á eftir toppliði Chelsea.