„Þetta er auðvitað meingallað kerfi“

„Þetta er auðvitað meingallað kerfi og þjónustan sem við skattgreiðendur borgum fyrir er ekki virk,“ segir Þorsteinn Eggertsson sem reynt hefur að ná í lækni til að endurnýja lyfseðil sinn í þrjá daga án árangurs.

„Þetta hófst allt á mánudaginn, þá hafði ég samband við Heilsugæsluna Árbæ, sem er mín heilsugæslustöð. Ég ætlaði að nýta mér símatíma, því ég þurfti einfaldlega að fá lyfseðilinn minn endurnýjaðan,“ segir Þorsteinn. Enginn læknir gat sinnt honum en hann fékk samband við hjúkrunarfræðing.

„Hún sagði mér að hún gæti ekki skrifað upp á lyf. Hún sagði mér að hafa samband daginn eftir og þá byðja um svokallaðan skynditíma, hún taldi mig eiga rétt á því – svo ég fengi nú lyfin mín,“ útskýrir Þorsteinn.

Hann fór að ráðum hjúkrunarfræðingsins og hafði aftur samband í gær. „Þegar ég hringdi í gær var mér tjáð að enginn læknir væri á vakt. Þá var bara lok, lok og læs.“ Þorsteinn hafði því engan kost í stöðunni nema reyna aftur í morgun.

„Þegar ég hafði samband í morgun fékk ég þau skilaboð að læknirinn sem væri á vakt væri uppbókaður. Ég tiltók þá að hjúkrunarfræðingurinn hafði bent mér á að biðja um skynditíma. Það dugði heldur ekki til, allir sem voru á undan mér í röðinni voru líka með skynditíma,“ segir Þorsteinn.

Þorsteinn bíður því enn eftir lyfjunum sem hann þarf. „Mér var bent á læknavaktina sem ég get farið á eftir klukkan fimm á daginn. Þá þyrfti ég að borga þrjú þúsund fyrir það eitt að endurnýja lyfseðil – þjónustu sem ég á að geta fengið ókeypis á heilsugæslustöðinni minni.“

Hann er ósáttur með stöðu mála. „Þetta er auðvitað pínlegt. Ég er, eins og svo margir aðrir, ekki með neinn heilsugæslulækni – hann flutti til útlanda. Ég hef litla reynslu af þessu heilbrigðiskerfi, ég hef lítið þurft að nota það. En núna þegar ég þarf á því að halda virðist mér fyrirmunað að fá þjónustu,“ segir Þorsteinn.