Segja Icelandair bera flugmenn röngum sökum

Farþegar Icelandair sem fengu upplýsingar um að flug FI 540 þann 2. ágúst hefði verið fellt niður vegna verkfallsaðgerða flugmanna fengu ekki réttar upplýsingar. Þetta kemur fram á vef Félags íslenskra atvinnuflugmanna (FÍA).

Þar segir að deildarstjóri fyrirtækisins hefði látið þessar upplýsingar í té en þær séu alrangar. Flugmenn hafi verið í verkfalli í maí og hafi ekki verið í verkfallsaðgerðum síðan  kjarasamningur var undirritaður 21.maí síðastliðinn. „Ofangreind ástæða sem starfmaður þjónustueftirlits Icelandair gefur farþegum félagsins er því með öllu óskiljanleg og aðför að heilum hópi samstarfsmanna hans,“segir á vef FÍA.

„Það er leitt að menn skuli leiðast út á þessa braut og stjórn stéttarfélagsins telur óhjákvæmilegt að opinbera framkomu þjónustueftirlits Icelandair, í ljósi þess að óvíst er hve margir aðrir en þeir sem leituðu til FÍA hafi fengið þessa skýringu á niðurfellingunni.“

Ekki náðist í Guðjón Arngrímsson, upplýsingafulltrúa Icelandair, við vinnslu fréttarinnar.