Varhugavert að tengja VSK á bækur við lestrarkunnáttu

Menntamálaráðherra segir varhugavert að draga of miklar ályktanir af sambandi læsis og virðisaukaskatts á bækur. Grunnskólabörn hafi komið betur út úr PISA rannsókn þegar virðisaukaskattur á bækur var hærri en hann verði eftir hækkun hans samkvæmt fjárlagafrumvarpi.

Með þeim breytingum sem ríkisstjórnin boðar í fjárlagafrumvarpinu  á virðisaukaskatti hækkar lægra þrep skattsins úr 7 prósentum í 12 og þar með hækkar skattlagningin á bækur og tónlist. Þrýst hefur verið á stjórnvöld að undanskilja bækur frá hækkuninnni og jafnvel alveg frá álagningu virðisaukaskatts, enda slái það skökku við að skattleggja bækur á sama tíma og íslensk börn komi illa út í rannsóknum á læsi.

„Ég hef heyrt þessa umræðu og hún er skiljanleg. Ég vil þó benda á að það er varhugavert að draga of miklar ályktanir um samband á milli læsis og virðisaukaskattskerfisins. Ef við skoðum t.d. niðurstöðuna árið 2000 þá er hún mun betri en hún var núna síðast. En þó var það svo að þá hafði verið 14 prósenta virðisaukaskattur síðustu sjö átta ár þar á undan. Megnið af þeirri skólagöngu sem þá var hjá börnunum,“ segir Illugi Gunnarsson menntamálaráðherra.

Þetta sé mun flóknara mál. Til að mynda verði að  horfa til kennsluhátta, námsefnis, undirbúnings kennara og svo þátttöku foreldra.

„Það er sjálfsagt auðvitað að ræða mögulegar afleiðingar þessa. En það er rétt að hafa í huga að fyrirhuguð hækkun á skattinum núna er þó upp í 12 prósent sem er lægra en það hlutfall sem var á þeim tíma sem ég nefndi hér áðan,“ segir menntamálaráðherra.

Fræðibækur og barnabækur bæru í sumum löndum Evrópu engan virðisaukaskatt og því eðlilegt að fólk vildi ræða það án þess að hann hafi sjálfur lagt það til. Hann styðji fjárlagafrumvarpið.

„Þetta er tillagan sem hefur komið fram og ég auðvitað bæði styð fjárlagafrumvarpið og líka tekjuöflunarfrumvarpið sem fjármálaráðherra hefur lagt fram,“ segir Illugi Gunnarsson.