Þorkell Gunnar snýr aftur á RÚV

Staða íþróttadeildar RÚV hefur vænkast en íþróttafréttamaðurinn Þorkell Gunnar Sigurbjörnsson mun snúa aftur í Efstaleitið eftir tæpa árs fjarveru. Þorkell Gunnar hefur starfað hjá Morgunblaðinu síðan í vor en hann missti vinnu sína hjá RÚV í fjöldauppsögnum í nóvember í fyrra.

Líkt og Vísir fjallaði um í síðustu viku hafa aðeins tveir íþróttafréttamenn verið við störf hjá RÚV undanfarnar vikur. Ástandið varð til þess að Kristín Harpa Hálfdánardóttir, yfirmaður á deildinni, sagði upp störfum. Haukur Harðarson er í fæðingarorlofi og sömu sögu er að segja um Benedikt Grétarsson. Óvíst er um stöðu hans að loknu orlofi.

„Niðurskurðurinn hefur orðið til þess að ég sá ekki lengur mögulegt að ná markmiðum mínum á íþróttadeild RÚV,“ sagði Kristín Harpa í samtali við Vísi.

Eftir stóðu Einar Örn Jónsson, sem tók við stöðu yfirmanns, og Hans Steinar Bjarnason sem hefur verið á fréttavakt nánast upp á hvern einasta dag.

Samkvæmt heimildum Vísis hefur Þorkell Gunnar sagt starfi sínu lausu hjá Morgunblaðinu þar sem hann hefur starfað síðan í vor. Þá vann hann við umfjöllun Stöðvar 2 Sport um Vetrarólympíuleikana í febrúar. Hann var einn fjölmargra starfsmanna RÚV sem misstu vinnuna í kjölfar niðurskurðar í nóvember fyrir tæpu ári. Adolf Ingi Erlingsson og Edda Sif Pálsdóttir misstu einnig vinnuna í uppsögnunum.

Þorkell Gunnar tilkynnti yfirmönnum sínum á Morgunblaðinu á laugardaginn að hann hyggðist segja upp. Að óbreyttu mun hann hefja störf á RÚV á næstu dögum.