Englendingar komust á EM - Evrópumeistararnir skildir eftir

Enska U21 árs landsliðið í knattspyrnu komst á EM 2015 í Tékklandi í kvöld, en það lagði Króatíu, 2-1, á útivelli.

Fyrri leik liðanna lauk einnig með sigri Englands, 2-1, og fóru enskir því áfram, samanlagt 4-2. William Hughes og Liam Moore skoruðu mörkin.

Stærstu tíðindin voru á Spáni þar sem heimamenn töpuðu 2-1 fyrir Serbíu og samanlagt með sömu tölum eftir markalaust jafntefli í fyrri leiknum.

Spánverjar hafa unnið síðustu tvö Evrópumót en þeir verða ekki í Tékklandi að ári til að verja titilinn.

Auk Englendinga og Serba komust Ítalir, Þjóðverjar, Portúgalar og Danir á EM, en Danir höfðu betur í tveimur viðureignum gegn Íslandi.

Leikur Svíþjóðar og Frakklands er hafinn, en sigurvegarinn úr þeirri rimmu verður áttunda og síðasta þjóðin sem kemst á EM.

Úrslit kvöldsins:

Ísland - Danmörk 1-1 (1-1 ú)

Ítalía - Slóvakía 3-1 (4-2)

Króatía - England 1-2 (2-4)

Þýskaland - Úkraína 2-0 (5-0)

Portúgal - Holland 5-4 (7-4)

Spánn - Serbía 1-2 (1-2)