Gefur út hjá rússneskum plötusnúði

„Ég tók með mér USB-lykil með minni eigin tónlist þegar hún spilaði á tónleikum í Köben, svo er ég þarna allt kvöldið og undir morgun gef ég Ninu kubbinn,“ segir raftónlistarmaðurinn Bjarki Rúnar Sigurðsson, betur þekktur sem Kid Mistik. Hann hefur nú skrifað undir hjá nýstofnuðu útgáfufyrirtæki hins virta rússneska plötusnúðar Ninu Kraviz , трип sem borið er fram sem „trip“.

„Þetta endaði í stuttu spjalli, stuttu síðar hefur hún samband og í sumar bauð hún mér að gefa út á útgáfunni sinni. Fyrst bjóst ég við að hún myndi bara spila dótið mitt en síðan varð þetta meira alvarlegt af hennar hálfu.“

Bjarki gefur út undir eigin nafni hjá fyrirtækinu en það á að hans sögn skylt við house- og acid-raftónlist. Bjarki verður með eitt lag á fyrstu safnplötu útgáfunnar sem kemur út í desember en plötusnúðurinn Addi Exos frá Thule Records verður líka með lag þar.

„Nina hefur litið upp til Adda og Thule frá því að hún var yngri, ég fékk að vita betur í gegnum hana hvað Thule Records stendur sterkt inni í senunni í dag og hvað það er virt útgáfufyrirtæki.“