Landsliðslæknir Spánverja svarar Mourinho fullum hálsi

Spænska landsliðið og José Mourinho eru komin í hart vegna ummæla Portúgalans um meiðsli Diego Costa, framherja Chelsea, á dögunum.

Mourinho er vægast sagt pirraður vegna þess að Costa hefur ekki spilað síðan hann tók þátt í tveimur leikjum með spænska landsliðinu á þremur dögum í undankeppni EM 2016 fyrr í mánuðinum.

Hann sagði í samtali við portúgalska blaðamenn að meiðslin væru spænska landsliðinu að kenna vegna meðhöndlunar á framherjanum í leikjunum gegn Slóvakíu og Lúxemborg.

Costa tognaði aftan í læri og fékk einnig vírus sem kom honum á sjúkrahús. Mourinho sagði það hafa aftrað spænska landsliðsframherjanum í endurhæfingu sinni.

„Costa sagði ekkert við okkur um tognun aftan í læri. Þegar hann kom til móts við landsliðið sagðist hann eiga við minniháttar meiðsli að stríða í náranum, en ekkert alvarlegt,“ segir José Garcia Cota, læknir spænska landsliðsins, við IB Times.

„Hann spilaði líklega tognaður aftan í læri fyrir Chelsea en kvartaði ekkert yfir því við okkur. Hann var meðhöndlaður af sjúkraþjálfurum okkar eins og hver annar leikmaður og átti í engum vandræðum með að klára æfingarnar.“