Innlent

Sígarettusala tíu prósentum minni en í fyrra eftir hækkun tóbaksgjalds

Þorgils Jónsson skrifar
Íslendingar keyptu talsvert minna af sígarettum á fyrstu níu mánuðum ársins en á sama tíma í fyrra.
Íslendingar keyptu talsvert minna af sígarettum á fyrstu níu mánuðum ársins en á sama tíma í fyrra.

Hækkun tóbaksgjalds sem gekk í gildi um síðustu áramót virðist hafa orðið til þess að sala á sígarettum dróst saman um tæp tíu prósent á fyrstu níu mánuðum ársins, að því er fram kemur í sölutölum ÁTVR. Frekari hækkun gjaldsins er boðuð í fjárlagafrumvarpinu.

Sala á vindlum dróst saman um 8,6% og sala á neftóbaki, sem oftar en ekki er tekið í vörina, dróst saman um rúm fjögur prósent eftir síaukna söluaukningu síðustu ár. Sala á píputóbaki og öðru reyktóbaki jókst milli ára.

Gjöld á sígarettur hækkuðu um 20%, úr 365,64 krónum á pakka í 439,83 krónur á pakka. Smásöluverð á algengustu sígarettutegundum hefur hækkað í samræmi við það og kostar pakkinn nú um það bil 1.200 krónur. Tóbaksgjald á neftóbak tvöfaldaðist, fór úr 7,21 krónu á gramm upp í 14,42 krónur og smásöluverð á tóbaksdós hækkaði úr 890 krónum upp í 1.845 krónur milli ára.

„Samkvæmt Alþjóðaheilbrigðisstofnunni er hækkun á skatti vænlegasta leiðin til að draga úr tóbaksneyslu og skaðsemi af hennar völdum,“ segir Viðar Jensson, verkefnastjóri hjá Embætti landlæknis, og bætir við að ungt fólk sé sérstaklega næmt fyrir hækkunum á tóbaki. Verulega hefur dregið úr reykingum hér á landi síðustu ár.

Reykingar hafa dregist verulega saman hér á landi síðustu ár samkvæmt könnunum, þar sem um 22 prósent fólks á aldrinum fimmtán til 89 ára sagðist reykja daglega árið 2003, miðað við 13,8 prósent í fyrra. Auk þess hafa reykingar í elstu bekkjum grunnskóla dregist verulega saman, úr fjórtán prósentum árið 2003 niður í þrjú prósent í fyrra.

Aðspurður um áhrif samdráttar í sölu á tekjur ÁTVR það sem af er ári segir Einar S. Einarsson, framkvæmdastjóri sölusviðs fyrirtækisins, að þær séu óverulegar. 

„Samdrátturinn í sölu hefur ekki haft neikvæð áhrif á reksturinn. Frekar hitt að tekjur hafi aukist lítillega frá því í fyrra vegna hækkunar á tóbaksgjöldum sem vegur upp á móti minni sölu.“

Í frumvarpi til fjárlaga 2014 er gert ráð fyrir enn meiri tekjum ríkissjóðs af tóbaksgjaldi en á síðasta ári.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.