Frumsýningarhelgi í Evrópu

Deildarkeppnirnar í Evrópu fara á ný af stað um helgina eftir landsleikjahlé. Félagaskiptaglugginn lokaði þann 2. september og þá voru leikmenn margir hverjir komnir til móts við sín landslið. Það verða því margir leikmenn í nýjum búningum um helgina.

Stærsta nafnið er án efa Gareth Bale en Real Madrid gekk frá kaupum á honum þann 1. september frá Tottenham Hotspur fyrir 85 milljónir punda. Hann varð þá dýrasti leikmaðurinn í sögunni og samdi til sex ára við spænska stórveldið. Real Madrid heimsækir Villareal í kvöld og gæti Wales-verjinn komið við sögu í þeim leik en beðið hefur verið eftir því með eftirvæntingu í allt sumar að Bale spili sinn fyrsta leik.

Englandsmeistarar Manchester United fóru ekki mikinn á leikmannamarkaðnum í sumar en náðu samt sem áður að festa kaup á belgíska miðjumanninum Marouane Fellaini frá Everton þann 2. september. Félagið greiddi 27,5 milljónir punda fyrir hinn hárprúða Fellaini en liðið hefur sárlega vantað skapandi miðjumann í fyrstu þremur deildarleikjum liðsins á tímabilinu.

United mætir Crystal Palace í fyrsta leik helgarinnar í hádeginu í dag. Búist er við því að Belginn verði í leikmannahópnum og gæti jafnvel farið beint inn í byrjunarliðið. David Moyes, knattspyrnustjóri Manchester United, þekkir vel til leikmannsins þar sem hann stýrði Everton á árunum 2002-2013.

Góður liðsstyrkur

Everton náði að styrkja hópinn um tvo sterka leikmenn undir lokin en þeir Gareth Barry og Romelu Lukaku komu báðir til félagsins á láni út leiktíðina. Barry frá Manchester City og Lukaku frá Chelsea.

Barry gæti verið inni á miðjunni fyrir Everton gegn West Ham í dag og á hlutverk hans eflaust að leysa Marouane Fellaini af hólmi. Lukaku var á láni hjá West Bromwich Albion á síðustu leiktíð og skoraði þá sautján mörk með liðinu.

Forráðamenn Chelsea hafa fengið framherjann Samuel Eto‘o frá Anzhi Makhachkala til liðsins og því ekki lengur pláss fyrir belgíska framherjann Lukaku. Eto‘o gæti því leikið á ný undir stjórn José Mourinho, knattspyrnustjóra Chelsea, þegar liðið fær Fulham í heimsókn í dag.

Arsene Wenger, knattspyrnustjóri Arsenal, tók einnig upp veskið í upphafi mánaðar þegar hann festi kaup á Mesut Özil frá Real Madrid á 42,5 milljónir punda en stjórinn hafði verið harðlega gagnrýndur allt sumarið fyrir að styrkja ekki hópinn nægilega mikið. Þjóðverjinn gæti því hæglega komið við sögu þegar Arsenal mætir Sunderland á Leikvangi ljóssins í dag.

Odemwingie snýr aftur

Ólátabelgurinn Peter Odemwingie gerði þriggja ára samning við Aron Einar Gunnarsson og félaga í Cardiff en hann hefur ekki leikið knattspyrnuleik í átta mánuði en eins og frægt er orðið reyndi hann að komast inn á Loftus Road, heimavöll QPR, til að ganga sjálfur frá samningum við félagið í janúar á þessu ári. Þá var leikmaðurinn samningsbundinn West Bromwich Albion og lék ekki fleiri leiki fyrir félagið eftir atvikið.

Framherjinn 32 ára gæti því verið í liði Cardiff er liðið mætir nýliðum Hull í dag.

Stærsta fréttin í ítalska boltanum er líklega endurkoma Kaká til AC Milan.

Brasilíski miðjumaðurinn hélt frá Mílanó til Real Madrid fyrir fjórum árum en náði sér aldrei á strik með þeim spænsku. Leikmaðurinn skrifaði undir tveggja ára samning við Mílanóliðið.

Það er því spurning hvort þær 630 milljónir punda eða þeir 118 milljarðar íslenskra króna borgi sig, en það er upphæðin sem ensk félög eyddu í leikmenn í sumarglugganum í ár. Standa menn undir nafni á frumsýningarhelgi?