Háhýsi bönnuð í miðborginni

Fortakslaust bann verður sett á byggingu háhýsa á svæðinu innan Hringbrautar í Reykjavík, samkvæmt nýju aðalskipulagi borgarinnar.

Hús þar mega ekki vera hærri en fimm hæðir. Þá verður hverfisvernd sett á svæðið í því skyni að vernda einkenni þess. Drög að aðalskipulagi Reykjavíkur 2010 til 2030 verða kynnt í borgarráði í dag.

Dagur B. Eggertsson, formaður borgarráðs, segir að með því verði staðfest að Reykjavík verði ekki háhýsaborg. Umrædd hverfisvernd slái nýjan tón í húsverndarmálum. „Húsvernd í Reykjavík, og kannski á Íslandi almennt, var lengi vel kannski fyrst og fremst vernd á einstökum húsum, byggðum á tilteknum tíma eða teiknuðum af tilteknum arkítekt. Þarna erum við að vernda heilt svæði vegna einkenna þess. Ekki bara einstök hús, heldur líka borgarmyndina, götumyndina og svo svipmótið.“

Lögð verður áhersla á að uppbygging sem þegar hefur verið leyfð og á þeim svæðum sem til séu í eldra skipulagi, sé í góðu samspili við það sem fyrir er. „Það er hins vegar alveg fortakslaust að í þessu felst að raska ekki því sögulega gatnaskipulagi sem þarna er, því hvernig byggingareitirnir eru, hvernig opnu rýmin eru og lóðaskipan. Við erum að segja að þessi sögulegi kjarni í Reykjavík hafi gildi eins og hann er og við erum að segja að Reykjavík sé ekki háhýsaborg.“

Dagur segir þetta þýða að ekki verði reistar nýjar blokkir eins og í Skuggahverfinu, en þær hafa verið mjög umdeildar. Almennt verði háhýsi ekki heimiluð í borginni nema að ákveðnum kröfum og skilyrðum uppfylltum. Lágreistar byggingar eigi að einkenna Reykjavík.