Þungt haldinn á gjörgæslu eftir árás dóttursonar síns

Maður á áttræðisaldri liggur alvarlega slasaður á sjúkrahúsinu á Akureyri eftir að nítján ára dóttursonur hans réðst við annan mann inn á heimili hans á Skagaströnd snemma í gærmorgun og gekk í skrokk á honum. Árásin tengist kynferðisbrotum sem afinn er grunaður um gegn barnabörnum sínum.

Maðurinn hafði sjálfur samband við lögreglu og tilkynnti um árásina um klukkan hálfsex í gærmorgun. Piltarnir tveir höfðu brotist inn til hans, vakið hann og í kjölfarið látið höggin dynja á honum.

Að sögn Gunnars Jóhannssonar hjá lögreglunni á Akureyri voru manninum veittir alvarlegir áverkar í andliti og á höfði og mun hann meðal annars hafa beinbrotnað. Árásarmennirnir voru á bak og burt þegar lögregla og sjúkraflutningamenn komu á staðinn.

Maðurinn var fluttur á sjúkrahúsið á Akureyri og þar fengust þær upplýsingar í gærkvöldi að hann lægi á gjörgæsludeild með alvarlega höfuðáverka en að hann væri með meðvitund og að líðan hans væri stöðug.

Piltarnir tveir voru síðan handteknir um hádegisbil í gær og voru enn í haldi lögreglunnar á Akureyri í gærkvöldi. Gunnar Jóhannsson sagði að til stæði að yfirheyra þá annað hvort síðar um kvöldið eða í dag og að í kjölfarið yrði tekin ákvörðun um það hvort farið yrði fram á gæsluvarðhald yfir þeim.

Lögreglan segir árásina tengjast því að maðurinn er grunaður um að hafa beitt barnabörn sín grófu kynferðisofbeldi um langt árabil fram til síðustu aldamóta. Tveir dóttursynir hans, bræður sem nú eru á þrítugsaldri, lögðu fram kæru á hendur honum í haust, tæpu ári eftir að fjölskylda mannsins bar sakirnar upp á hann. Lögregla rannsakaði ásakanirnar mánuðum saman og sendi málið svo til ríkissaksóknara nú fyrr í mánuðinum.

Upphaflega var til rannsóknar grunur um að maðurinn hefði einnig brotið gegn dóttursyninum, þeim sem réðst á hann í gær. Sá hefur þó ekki lagt fram kæru og málið rataði ekki til ríkissaksóknara.