Hafnarfjörður of stór fyrir innkomuvöktun

Bæjarráð Hafnarfjarðar hefur hafnað beiðni Securitas um kynningarfund um innkomuvöktun með myndavélum í sveitarfélaginu.

Securitas kynnti innkomuvöktunina, sem ætluð er til stuðnings löggæslu, á fjármálaráðstefnu sveitarfélaganna í október.

Kerfið felst í myndavélum við bæjarmörk sveitarfélaga ásamt greiningarhugbúnaði sem skráir númer ökutækja sem ekið er fram hjá. Miðað er við að búnaðurinn sé settur upp á bæjarmörkum hjá smærri sveitarfélögum en á hverfamörkum hjá þeim stærri.

Guðrún Ágústa Guðmundsdóttir, bæjarstjóri í Hafnarfirði, segir bæjarráð telja að þjónustan henti Hafnarfirði ekki.

„Við erum með Reykjanesbrautina þvert í gegnum sveitarfélagið og við værum ekki að auka öryggi með því að setja upp myndavélar við innkomur að sveitarfélaginu. Við töldum að þetta hentaði ekki Hafnarfirði,“ segir bæjarstjórinn.