Jackass-stjarna fer hamförum á Íslandi

Hjólabrettakempan og ofurhuginn Bam Margera lætur allt flakka í nýju tónlistarmyndbandi sem hann sendi frá sér í gær.

Myndbandið er við lagið Bend My Dick to My Ass, og er tekið upp að öllu leyti á Íslandi. Það gerði Margera ásamt tveggja manna tökuliði frá íslenska framleiðslufyrirtækinu Illusion, og í myndbandinu má meðal annars sjá þennan heimsþekkta pörupilt henda sér fullklæddur í sundlaug, hoppa uppi á bílum og drekka eigið hland.

Fannar Edwardsson hjá Illusion segir myndbandið hafa verið tekið upp síðasta sumar og sé í raun ekki fullklárað. "Ég vissi ekki einu sinni af því að hann hefði hent þessu á netið. Myndbandið er nefnilega ekki alveg tilbúið. En það er gaman að þessu."

Margera setti myndbandið, sem nú hefur verið fjarlægt af Youtube-myndbandaveitunni vegna kynferðislegt innihalds þess, inn á vefsíðu sína í gær, og hefur því verið deilt um 2000 sinnum á rétt rúmlega hálfum sólarhring.

"Hann kíkti til Íslands í frí, rakst á samstarfsmenn mína á Prikinu og þeir fóru að spjalla um þetta lag sem hann var að gera. Svo var bara ákveðið að skella í eitt myndband og ferðin hans snerist síðan bara um það."

Margera, sem þekktastur er fyrir störf sín með Jackass-hópnum (Kjánaprikunum), komst í fréttir síðasta sumar vegna milljónatjóns sem hann olli á bílaleigubíl hér á landi, en bílnum má sjá bregða fyrir í myndbandinu.