Áhöfnin á Goðafossi heiðruð

Áhöfnin á Goðafossi var í gær heiðruð fyrir hetjulega framgöngu við björgunarstörf þegar eldur kom upp í skipinu þann 11. nóvember síðastliðinn. Goðafoss er í eigu Eimskipafélags Íslands og Gylfi Sigfússon, forstjóri fyrirtækisins, veitti áhöfninni sérstaka viðurkenningu.

„Áhöfnin vann hetjusamlegt björgunarstarf við mjög erfiðar aðstæður. Enn á ný sannaðist að þjálfun og menntun íslenskra sjómanna skiptir gríðarlegu máli. Við verðum að tryggja að sú menntun verði áfram með þeirri bestu sem gerist í heiminum,“ sagði Gylfi við afhendingu viðurkenningarinnar.

Goðafoss var staðsettur um 70 sjómílur vestur af Færeyjum og á leið til Íslands þegar eldurinn kom upp. Var það klukkan fjögur um nóttu og var vonskuveður. Allir um borð, þrettán í áhöfn og þrír farþegar, sluppu heilir á húfi og áhöfnin náði að ráða niðurlögum eldsins.