Á fimmta hundrað nemenda mótmæla fyrir utan menntamálaráðuneytið

Nemendur við menntaskólann í Reykjavík fjölmenntu fyrir utan menntamálaráðuneytið í dag til að mótmæla framlags ríkistjórnarinnar til skólans í fjárlögum ársins 2014.

Vel á fimmta hundrað manns voru fyrir utan ráðuneytið en neyðarfundur var haldinn í MR á þriðjudaginn vegna stöðu sem upp er komin í fjármálum skólans.

Fjárframlög til skólans hafi dregist jafnt og þétt saman síðustu árin og í fyrirliggjandi fjárlagafrumvarpi fái nemendur MR enn og aftur lægst framlög allra framhaldsskóla á landinu.

Auk þess stóðu nemendur við skólann fyrir undirskriftasöfnun í síðustu viku og afhentu MR-ingar Illuga Gunnarssyni, mennta- og menningarmálaráðherra, undirskriftirnar í dag.

MR-ingar sendu frá sér opið bréf á föstudaginn þar sem þeir mótmæla harðlega fjárlögum ársins 2014 en fram kemur í bréfinu;

,,Eftir að hafa skoðað tillögur til fjárlaga 2014 erum við vægast sagt undrandi. Þar kemur fram að Menntaskólinn í Reykjavík fær, enn og aftur, minnsta fjárframlag allra framhaldsskóla á Íslandi“.

Hér að ofan má sjá myndir af mótmælunum.