Þór og þyrlunum snúið við

Engan af 13 manna áhöfn og þremur farþegum um borð í flutningaskipinu Goðafossi sakaði, þegar eldur kom upp í skipinu um klukkan fimm í morgun þegar það var statt 70 sjómílur vestur af Færeyjum á leið til Íslands.

Landhelgisgæslan sendi þegar tvær þyrlur og eftilitsvél gæslunnar af stað og kom á sambandi við björgunaraðila í Færeyjum.

Um sex leitið í morgun taldi áhöfnin á Goðafossi sig vera búna að ráða niðurlögum eldsins og unnið væri að kælingu. Báðar Gæsluþyrlurnar eru nú  á Höfn í Hornafirði að taka eldsneyti og bíða frekari fyrirmæla, enda virðist eldurinn útdauður og skipið siglir fyrir eigin vélarafli.

Eftirlitsflugvél Gæslunnar er hinsvegar komin á vettvang og varðskipið Þór var sent frá Reykjavík til móts við Goðafoss en nú hefur verið ákveðið að snúa varðskipinu við auk þess sem þyrlurnar snúa nú aftur til Reykjavíkur.