Ólafur hlýtur Eugene McDermott verðlaunin

Ólafur Elíasson hlýtur Eugene McDermott verðlaunin 2014 sem MIT háskólinn veitir árlega. MIT tilkynnti á heimasíðu sinni í dag um Ólafur hlyti verðlaunin og fær hann um 12 milljónir króna styrk til að sinna listsköpun sinni. Ólafur mun taka við verðlaunum á hátíðarkvöldverði 12. mars á næsta ári.

„Það er mikill heiður fyrir mig að hljóta þessi verðlaun frá MIT sem er stofnun sem hefur langa hefð fyrir því að koma hugsunum í framkvæmd,“ segir Ólafur á heimasíðu MIT.

Auk styrksins fær Ólafur að dvelja hjá MIT þar sem hann fær tækifæri til að opna sýningu og komast í tæri við efnilega listamenn sem eru í námi hjá skólanum.

Ólafur er þekktastur fyrir skúlptúra og umsvifamiklar innsetningar. Eugene McDermott verðlaunin voru fyrst veitt árið 1974 og er Ólafur sá 41. sem hlýtur þessi eftirsóttu verðlaun.