Skemmdarvargarnir eru tilbúnir að bæta fyrir brot sín

Fjöldi fólks deildi um helgina myndbandi af hópi manna sem sáust eyðileggja  stóla, borð og annað lauslegt á Ingólfstorgi. Í samtali við fréttastofu 365 í gær sögðust þeir hafa framið verknaðinn í mótmælaskyni, en þeim þótti þrengt að aðstöðu hjólabrettafólks á torginu.

Tveir piltanna sem frömdu verkanðinn, Julian og  Róbert, mættu í viðtal í Harmageddon í dag, en þar sögðust þeir vera tilbúnir að bæta fyrir brot sín. Þá segjast þeir ekki hafa framið skemmdarverkin í haturshug gagnvart borginni, né hafi verknaðurinn verið uppreisn fyrir hjólabrettamenninguna.

„Þetta var bara fyllerí og flipp sem gekk of langt, við sjáum mikið eftir þessu," sagði annar þeirra í viðtalinu. Piltarnir segjast vera tilbúnir að taka afleiðingum málsins verði þeir kærðir.

„Okkur líður ömurlega yfir þessu en við verðum bara að læra af mistökunum.  Ef við verðum kærðir þá verðum við bara kærðir og verðum að taka því," segja þeir jafnframt.

Í spilaranum hér að ofan er hægt að hlusta á viðtalið í heild sinni.