Ferðamenn fyrstir á vettvang banaslyss

Hjónin Paul og Sandy Urgo komu hingað til lands í byrjun ágúst ásamt Joe,syni sínum. Fjölskyldan ætlaði að ferðast hringinn í kringum Ísland. Ferðalag þeirra tók skyndilega krappa beygju þegar þau keyrðu að umferðarslysi á Suðurlandsvegi, austan við Meðallandsveg, þann fjórða ágúst síðastliðinn. Vefsíðan presspubs.com segir frá málinu í dag. 

Fjölskyldan var fyrst á vettvang banaslyss þar sem tvær pólskar stúlkur, sem voru einnig ferðamenn hér á landi, létu lífið. Stúlkurnar voru í bíl með foreldrum annarrar stúlkunnar. Þær köstuðust út úr bílnum þegar bílstjórinn missti stjórn á ökutækinu. Önnur stúlkan var á lífi þegar fjölskyldan kom að slysinu.

Urgo-fjölskyldan kom foreldrunum til bjargar þar sem þeir sátu fastir inni í bílnum og eldur var kviknaður. „Ef við hefðum komið tveimur mínútum seinna hefðum við ekki getað bjargað þeim, þá var bíllinn orðinn alelda,“ segir Sandy Urgo í grein Press Pubs.

Í greininni kemur fram að um tíma hafi litið út fyrir að önnur stúlkan myndi komast lífs af, en eftir margar tilraunir til björgunar kom allt fyrir ekki.

Þessi lífsreynsla tók skiljanlega mikið á Urgo-fjölskylduna,en sú staðreynd að hún gegndi lykilhlutverki í að bjarga tveimur mannslífum í slysinu og hjálpar þeim í sorginni.

Skömmu eftir slysið var stofnaður styrktarreikningur í nafni stúlknanna sem létust, en þær verða báðar jarðsungngar í Póllandi. Þeir sem vilja styrkja fjölskyldurnar geta lagt inn á reikning 0130-05-061895, kt. 200579-4029.