Goðsagnir Liverpool fordæma hegðun Suarez

Jamie Redknapp og Graeme Souness hafa gagnrýnt Luis Suarez harðlega fyrir hegðun Úrúgvæjans á knattspyrnuvellinum.

Um miðjan síðari hálfleikinn virtist Suarez bíta í handlegg Branislav Ivanovic, varnarmanns Chelsea. Í spjalli á Sky sjónvarpsstöðinni sagði Redknapp að hegðun Suarez væri óafsakanleg.

Souness tók í svipaðan streng.

„Ég veit ekki alveg hvernig ég á að orða þetta. Þetta er til skammar. Hann er að gera sér afar erfitt fyrir hjá Liverpool og hann er á síðasta séns," sagði Souness.

„Það sem skiptir mestu máli er að passa upp á orðspor knattspyrnufélagsins Liverpool. Félagið er þekkt um allan heim. Fólk mun ræða um þetta í langan tíma og sýnir svarta hlið á félaginu. Þetta er heldur ekki í fyrsta skipti sem hann bítur andstæðing," sagði Souness. Vísaði hann þar í sjö leikja bann sem Suarez hlaut árið 2010 fyrir að bíta leikmann PSV Eindhoven í leik með Ajax.

„Ég hef aldrei séð neitt þessu líkt í fótboltaleik. Sumt máttu einfaldlega ekki gera og þetta er eitt af því. Myndirnar munu sjást um heim allan. Það verður erfitt fyrir Brendan Rodgers að verja gjörðir hans. Stjórnmálamenn og fleiri munu láta heyra í sér," sagði Souness.

Atvikið umdeilda má sjá hér.