Fær læknisþjónustu og vernd í Bretlandi

Hin fjórtán ára gamla Malala Yousufzai var snemma í gærmorgun flutt af hersjúkrahúsi í Pakistan til Bretlands þar sem hún fær aðhlynningu og vernd gegn áframhaldandi árásum talibana, sem hafa heitið því að myrða hana.

Malala Yousufzai, fjórtán ára gömul pakistönsk stúlka, var í gær send til Bretlands með sjúkraflugi. Talibanar skutu Malölu og særðu lífshættulega þegar hún var á leið úr skóla fyrir viku síðan.

Malala var flutt með sjúkraflugi frá Pakistan til Sameinuðu arabísku furstadæmanna snemma í gærmorgun. Þar beið hún í nokkrar klukkustundir áður en flogið var með hana til Bretlands, þar sem hún mun fá læknishjálp næstu vikurnar. Læknar í Pakistan voru sammála um að flytja hana til Bretlands, þar sem hún gæti fengið sérhæfðari læknishjálp og notið aukinnar verndar gegn fleiri árásum talibana. Ákvörðunin var tekin í samráði við fjölskyldu Malölu og munu pakistönsk yfirvöld greiða kostnaðinn.

Talibanar réðust á Malölu vegna þess að hún hefur talað fyrir menntun stúlkna og gagnrýnt talibana. Þeir segja að hún hafi verið með áróður fyrir vestrænum þankagangi og hafa hótað því að þeir muni ekki linna látum fyrr en hún hafi verið myrt.

Utanríkisráðuneyti Bretlands hefur greint frá því að Malala verði lögð inn á almennan spítala í landinu, en gefur ekki frekari upplýsingar. „Bretland stendur með Pakistan í baráttunni gegn hryðjuverkum,“ sagði utanríkisráðherrann William Hague í tilkynningu. „Hugrekki Malölu til að berjast fyrir rétti allra ungra stúlkna í Pakistan til menntunar setur gott fordæmi fyrir okkur öll.“

Árásin á Malölu hefur valdið mikilli hneykslan um allan heim. Í Pakistan hafa verið haldnir útifundir henni til stuðnings. Nokkur hundruð manns hafa mætt á þá flesta en tugþúsundir mættu á fund á sunnudag í borginni Karachi.

Yfir 100 talibanar réðust á lögreglustöð í nágrenni borgarinnar Peshawar seint á sunnudagskvöld. Skotbardagar milli þeirra og lögreglumanna vöruðu í nokkrar klukkustundir og létu sex lögreglumenn lífið auk þess sem tólf til viðbótar hlutu skotsár. Tveir lögreglumannanna voru afhöfðaðir. Talibanarnir kveiktu í lögreglustöðinni og fjórum lögreglubílum áður en þeir flúðu vettvanginn.

thorunn@frettabladid.is