Ferguson: Dalglish missti starfið útaf Suarez málinu

Sir Alex Ferguson, knattspyrnustjóri Manchester United, segir að Kenny Dalglish hafi misst starf sitt sem knattspyrnustjóri hjá Liverpool vegna þess að hann hafi tekið ranga ákvörðun í „Suarez-Evra" málinu á síðustu leiktíð.

Luis Suarez leikmaður Liverpool var úrskurðaður í átta leikja keppnisbann vegna kynþáttafordóma sem beindust að Patrice Evra leikmanni Manchester United.

Ferguson er á keppnisferðalagi með lið sitt í Suður-Afríku og hann sagði við fréttamenn í gær að eigendur Liverpool hafi ekki verið sáttur við hvernig Dalglish tók á máli Suarez. „Það kom mér ekki á óvart að Kenny fór frá Liverpool. Ég held að eigandi Liverpool hafi ekki verið sáttur við hvernig tekið var á máli Suarez hjá félaginu," sagði Ferguson m.a. í gær.

Suarez tjáði sig um málið við sjónvarpsstöð í heimalandinu Úrúgvæ þar sem hann talaði um átta leikja bannið. Suarez sagði meðal annars að Manchester United hefði pólitíska valdið í enska boltanum og hefði nýtt sér það. Það hefði verið Evra að kenna að þeir hefðu ekki tekist í hendur í leiknum á Old Trafford. Talið er að forráðamenn Liverpool verði ekki allt of ánægður með þessi ummæli en félagið bannaði Suarez að tjá sig meira um það.