Góð loðnuveiði í gær

Góð loðnuveiði var vestur af Sandgerði síðdegis í gær og fram á kvöld, eftir að veður gekk heldur niður. Mörg skip fengu fullfermi og eru nú á leið til löndunar og eru fá skip á miðunum.

Mikill straumur var á svæðinu í gær sem gerði sjómönnum erfitt fyrir, en ekki er vitað til að neitt skipið hafi orðið fyrir alvarlegu veiðarfæratjóni. Loðnan er á leið fyrir Reykjanesið og inn á Faxaflóann.

Enn er spáð suðlægri átt þegar líður á daginn og segjast sjómenn vera orðnir þreyttir á þrálátum sunnan- og suðvestanáttum að undanförnu.