Aðalmeðferð í Straumsvíkurmálinu - játar innflutning á sterum

Aðalmeðferð hófst í morgun í Straumsvíkurmálinu svokallaða en þar eru sex einstaklingar ákærðir fyrir viðamikil fíkniefnabrot. Á meðal þeirra ákærðu eru mennirnir tveir sem taldir eru hafa lagt á ráðin um að smygla stórfelldu magni af fíkniefnum um borð í skipi sem kom frá Rotterdam til Straumsvíkur. Annar maðurinn hefur setið í gæsluvarðhaldi síðan en hinn hefur hafið afplánun vegna annars máls.

Lagði lögreglan hald á tæp tíu kíló af amfetamíni, rúmlega átta þúsund töflur af MDMA og mikið magn stera. Við aðalmeðferðina í morgun breytti einn hinna ákærðu framburði sínum. Hann hafði áður neitað sök í ákæru um að hafa komið að sterainnfluttningnum en hann hefur nú breytt framburðinum og játað aðkomu sína að því máli.

Þá er einn þeirra sem talinn er hafa staðið að smyglinu í Straumsvík ákærður ásamt öðrum manni fyrir að hafa haft um 250 grömm af amfetamíni og lítilræði af hassi undir höndum sem lögregla fann við húsleit.

Um fleiri smærri mál er að ræða sem öll tengjast á einhvern hátt innbyrðis.