Segir frásögn Pressunnar um gróft ofbeldi fullkomlega ranga

„Þessu er fljótt svarað, þessi frétt er nánast í engu samræmi við veruleikann," sagði Hörður Jóhannesson, aðstoðarlögreglustjórinn á höfuðborgarsvæðinu, þegar Reykjavík Síðdegis á Bylgjunni hafði samband við hann vegna hryllilegrar lýsingar manns sem birtist á vefnum Pressunni í morgun.

Í frétt Pressunnar kom meðal annars fram að lögreglan hefði afklætt manninn í fangaklefa með bros á vör og að lokum sprautað köldu vatni yfir allan fangaklefann og á manninn. Þá heldur hann því fram að hann hafi verið laminn í haldi lögreglu.

Hörður segir að Pressan hafi ekki haft samband við lögreglu vegna málsins. Hann bendir á að hann hafi farið yfir málið í dag, í ljósi alvarleika ásakana mannsins, og segir að ferlið frá því menn séu færðir á lögreglustöðina og að fangaklefa sé tekið upp af myndbandseftirlitskerfi hússins. Hann segir að það sé hinsvegar rétt að maðurinn hafi verið klæddur úr fötunum.

„Það var vegna þess að umræddur einstaklingur var í þannig ástandi að hann virtist mögulega ætla að skaða sig sjálfan," segir Hörður og bætir við að læknir hafi verið kallaður til sömu nótt, í kjölfarið var maðurinn færður á viðeigandi stofnun.

Spurður hvort það sé mögulegt að vatn hafi verið látið flæða inni í klefann eða á manninn segir Hörður það ekki rétt.

Hörður gagnrýnir Pressuna harðlega og segir að hingað til hafi lögreglan fengið að útskýra málavexti í svona alvarlegum málum áður en þau birtast. Þessi saga sé þó ekki sannleikanum samkvæm.

Hægt er að hlusta á fróðlegt viðtal við Hörð í Reykjavík síðdegis hér.