Ellefu milljarðar í styrki umfram útgjöld

Frá gildistöku samningsins um Evrópska efnahagssvæðið (EES) árið 1994 til og með síðasta ári, hafa íslenskir aðilar fengið úthlutað meira en 157 milljónum evra í styrki í gegnum rammaáætlanir ESB um menntun, rannsóknir og tækniþróun. Heildargreiðslur úr ríkissjóði vegna þessara áætlana hafa á sama tíma numið ríflega 87 milljónum evra. Mismunurinn er um 70 milljónir evra, eða rúmir ellefu milljarðar króna á núverandi gengi.

Þetta kemur fram í skriflegu svari Katrínar Jakobsdóttur, mennta- og menningarmálaráðherra, við fyrirspurn Vigdísar Hauksdóttur, þingkonu Framsóknarflokks.

Í svari ráðherra kemur jafnframt fram að árlegar styrkveitingar hafi tvöfaldast á þessu tímabili, úr tæplega sex milljónum evra árið 1995 í rúmlega tólf milljónir evra árið 2011.

Styrkirnir eru allt frá 400 milljónum króna niður í minnstu einstaklingsstyrki sem geta numið undir 100 þúsund krónum.

Margs konar aðilar hafa hlotið styrkina, allt frá háskólum, stofnunum og fyrirtækjum sem stunda rannsóknarstarf, niður í grunn- og framhaldsskóla og einstaka háskólastúdenta sem taka hluta af námi sínu við evrópska háskóla í gegnum Erasmus-verkefnið. - þj