Veitingahús með fornmannamat í torfkofa

„Mig langar að byggja fornaldarbæ í Hljómskálagarðinum eða miðbænum sem býður ferðamönnum að kynnast sögu okkar, mat og menningu,“ segir í einni tillögunni sem sett hefur verið fram á vefnum Betri Reykjavík sem borgin hefur nú rekið um nokkurt skeið.

„Ferðamenn sem koma til Íslands vilja kynnast sögu okkar, menningu og jafnvel bragða mat þann sem var á borðum fyrir 1000 árum,“ segir í tillögunni. „Staðurinn yrði úr torfi og grjóti og með gömlum húsgögnum. Kokkar og þjónustufólk verði í fötum þess tíma. Maturinn væri reyktur, lagður í súr, þurrkaður og svo framvegis. Gestir fengju kyrtil og sauðskinnsskó við komuna í skálann.“

Tillagan um veitingahús úr forneskju var lögð fram í menningar- og ferðamálaráði á mánudag. Ráðið sagði gildandi deiliskipulag fyrir Hljómskálagarð ekki gera ráð fyrir uppbyggingu af þessum toga þó að oft hafi verið ræddar hugmyndir um kaffihús sem myndi bæta þjónustu við gesti garðsins. Hugmyndin var þó ekki alfarið blásin út af borðinu. „Aðili sem hefur áhuga á að reisa og reka matsölustað getur sótt um lóð hjá Skipulags- og byggingarsviði og síðar rekstrarleyfi fyrir veitingastað hjá lögreglunni á höfuðborgarsvæðinu,“ sagði menningarráðið. - gar