Dagsektir vegna ókláraðs turns

Bæjaryfirvöld í Kópavogi ætla ekki að beita mannvirkjalögum til að annað tveggja láta rífa Norðurturninn við Smáralind eða ljúka við bygginguna. Fram hefur komið í Fréttablaðinu að Eignarhaldsfélagið Smáralind ehf. telur það valda því fjárhagstjóni að Norðurturninn sé ókláraður utan í verslunarmiðstöðinni. Eigandi Norðurturnsins er gjaldþrota. Í umsögn skrifstofustjóra umhverfissviðs Kópavogs til bæjarráðs er vitnað til þess að Helgi Birgison skiptastjóri segi viðræður í gangi um framtíð byggingarinnar.

„Full ástæða er til þess að taka mið af þeim óvenjulegu efnahagsaðstæðum sem ríkja um þessar mundir og gefa aðilum nokkuð svigrúm til þess að leita leiða til að klára bygginguna,“ segir skrifstofustjórinn sem kveður umfang verkefnisins slíkt að tæplega komi til álita að bærinn beiti mannvirkjalögum og láti klára verkið eða rífa bygginguna. Eina úrræðið sé beiting dagsekta sem séu með lögveði í byggingunni. Umdeilanlegt sé hvort árangursríkt sé að beita þrotabú dagsektum.

Bæjarráð ákvað að ef viðræður um framtíð Norðurturnsins skila árangri verði kallað eftir framkvæmdaáætlun frá nýjum eigendum. Verði hins vegar enginn framgangur á næstu þremur mánuðum verði kannað hvort skilyrði séu fyrir dagsektum. - gar