Hélt að litla stelpan væri dáin

„Þegar ég var akkúrat komin að 25 metrunum þá sýndist mér ég sjá dúkku og hélt að einhver væri að gera grín að mér," segir Aníka Mjöll Júlíusdóttir, ellefu ára, sem með snarræði bjargaði stúlku á öðru ári frá drukknun í Keflavík í gær.

Aníka var á sundæfingu í miðri skriðsundsferð þegar litla stelpan stökk út í laugina. Hún hafði stungið af frá fjölskyldu sinni, ósátt við að þurfa að fara upp úr, að sögn Ragnars Arnar Péturssonar, forstöðumanns Vatnaveraldarinnar í Reykjanesbæ. Ragnar segir að farið hafi verið yfir málið á fundi í fyrrakvöld og aftur í gær.

„Ég tók hana upp úr eins fljótt og ég gat. Þá gat hún varla andað en ég sló létt á bakið á henni og þá spýttist vatn upp úr henni. Þetta var mjög hræðilegt," segir Aníka og kveðst hafa verið mjög létt þegar hún heyrði stelpuna gráta. „Ég hélt að hún væri dáin," segir hún.

Þórunn Ósk Haraldsdóttir, móðir Aníku, er mjög stolt af dóttur sinni. „Hún var í svolitlu sjokki eftir þetta í gær og ég sagði bara við hana: „Þetta er bara nákvæmlega eins og alvöru hetjum líður"," segir Þórunn. -sh, sv