Vilja að neytendur fái auglýstan nethraða

Nýjar reglur Evrópusambandsins (ESB) um gæði internetþjónustu, sem til stendur að setja í haust, munu koma í veg fyrir að íslensk fjarskiptafyrirtæki geti auglýst að neytendur fái tengihraða allt að ákveðnu hámarki nema fyrirtækin uppfylli ströng skilyrði um að þjónustan standist þau loforð.

Fjarskiptafyrirtækin auglýsa í dag mismunandi netáskriftir sem flestar eiga það sameiginlegt að hraðinn er sagður ná „allt að“ einhverju ákveðnu hámarki. Það er hins vegar engin trygging fyrir því að hámarkið náist.

Samkvæmt núverandi regluverki er löglegt að auglýsa þjónustuna með þessum hætti, segir Hrafnkell V. Gíslason, forstjóri Póst- og fjarskiptastofnunar (PFS). Hann segir það líklega breytast með nýjum reglum ESB, sem verði sjálfkrafa teknar upp hér á landi.

„Í lok þessa árs eða byrjun þess næsta verða settar nýjar reglur sem skýra í hverju gæði internetþjónustu felast, þar með talið varðandi hraðann. Víða í Evrópu er fyrirtækjunum ekki heimilt að auglýsa „allt að“ nema þau geti uppfyllt strangar kröfur,“ segir Hrafnkell.

Hrafnkell segir að til standi að auka heimildir eftirlitsstofnana á borð við Póst- og fjarskiptastofnun til að skýra hvernig gæði fjarskiptaþjónustu eigi að vera. Stofnunin sé að auka eftirlit sitt, en eftir sé að skilgreina nákvæmlega gæði þjónustunnar.

„Að mæla hraða á internetinu er flóknara en að mæla hraða bíls á leið frá A til B,“ segir Hrafnkell. Hægt sé að tryggja að tengingin frá heimili að fjarskiptafyrirtæki nái ákveðnum hraða, en um leið og notandinn vafri á netinu sé hraðinn í mörgum tilvikum úr höndum þess fjarskiptafyrirtækis.

„Það er hægt að tryggja að tengingin frá heimili í næsta tengipunkt uppfylli ákveðin gæði. En það segir bara takmarkað mikið um þá þjónustu sem neytendur upplifa heima hjá sér,“ segir Hrafnkell.

„Við höfum eftirlit með villandi auglýsingum. Við erum hlynntari því að ekki sé verið að auglýsa hraða allt að ákveðnu hámarki. Auglýsingar eiga að vera nákvæmar, bæði hvað varðar verð og hraða,“ segir Þórunn Anna Árnadóttir, sviðsstjóri á neytendaréttasviði Neytendastofu.- bj