Grunur á að óprúttnir aðilar blekki eldri borgara með gylliboðum

Svo virðist sem óprúttnir aðilar séu farnir að bjóða eldri borgurum heimilishjálp þeim að kostnaðarlausu. Lögreglan varar við slíkum gylliboðum. Ellilífeyrisþegi fékk hringingu af þessu tagi, en hringjandi sagði þjónustuna í boði tiltekinna samtaka. Hringt var úr leyninúmeri, en þegar haft var samband við umrædd samtök kannaðist enginn við málið og þjónustan var ekki á þeirra vegum.

Lögregla segir grun leika á að eitthvað annað og verra búi þar að baki en heimilishjálpin. Mikilvægt sé því að fólk hleypi ekki ókunnugum inn á heimili sín nema að kanna fyrst hvort að viðkomandi sé sá sem hann segist vera. Í því felst að sannreyna að hinn sami sé frá þeim samtökum sem tilgreind eru, líkt og var gert í áðurnefndu tilviki.