100 milljóna sekt staðfest

Héraðsdómur Reykjavíkur hefur staðfest úrskurð áfrýjunarnefndar samkeppnismála um 100 milljóna króna sekt Lyfja og heilsu.

Sektin er til komin vegna misnotkunar fyrirtækisins á markaðsráðandi stöðu gagnvart Apóteki Vesturlands, að því er fram kemur á vef Samkeppniseftirlitsins, en það hóf rannsókn á brotum Lyfja og heilsu með húsleit í september 2007.

Áfrýjunarnefndin lækkaði árið 2010 sekt fyrirtækisins úr 130 milljónum.

Í dómnum eru brot Lyfja og heilsu sögð alvarleg og hafa miðað að því að hindra innkomu nýrrar lyfjaverslunar á markað sem fyrirtækið hafi áður setið eitt að. „Og síðan að því að veikja hinn nýja aðila og raska samkeppni.“ Kröfu um lækkun sekta var hafnað.