Vigtaði vitlaust - Eins og að fá egg í andlitið

Friðrik Höskuldsson, sá sem vigtaði matvörur og komst að þeirri niðurstöðu að pakkningarnar voru ítrekað vitlaust merktar, segir á Facebook síðu sinni að hann hafi gert mistök. Þannig biðst hann afsökunar og skrifar:

„Mig að gruna að ég væri úti í mýri með þetta. Málið er, að ég náði mér í aðra vigt til að sannreyna að ég hefði rétt/rangt fyrir mér. Sú vigt segir mér aðra sögu og tel ég þyngdirnar innan skekkjumarka. Áður en lengra verður haldið, ætla ég að trúa þeirri vigt og láta staðar numið. Þetta er semsagt „egg í andlitið" á mér, en þó vil ég biðja fólk um að halda vöku sinni yfir málefninu."

Vísir ræddi við formann Neytendasamtakanna fyrr í dag vegna málsins, en hann sagði að ef rétt reyndist þá væri verið að svindla á neytendum. Þetta leiðir þó í ljós að vigtunnin á ekki við rök að styðjast.

Þá kom fram að Neytendastofa hygðist bregðast við málinu með því að vigta matvörur, en það hefur Neytendastofa gert nokkrum sinnum, og komist að þeirri niðurstöðu að þyngdin passaði ekki alltaf við merkingar á pakkningum.

Sjálfur segir Friðrik: „Sorrí. Ég ætla samt að vera á vaktinni áfram, það er víst. En geri „vísindalegri" kannanir næst, áður en ég set inn færslu Facebook."