Svona gætu flugbrautir vikið út í Skerjafjörð

Hugmyndir um að flytja Reykjavíkurflugvöll að hluta út í Skerjafjörð eiga það sammerkt að þannig losnar mikið landrými og flugvöllurinn verður áfram á sömu slóðum.

Í umræðum um samgönguáætlun á Alþingi fyrir helgi varpaði Árni Þór Sigurðsson, fyrrverandi forseti borgarstjórnar, fram þeirri sáttalausn að austur-vesturbrautin yrði lengd til vesturs út í Skerjafjörð en jafnframt kvaðst hann opinn fyrir því að hafa stutta þverbraut. Væntanlega yrði þá skoðað að halda eftir hluta núverandi norður-suðurbrautar eða jafnvel frekar litlu norðaustur-suðvesturbrautinni, sem gæti hentað betur gagnvart vindáttum, en sú braut hefði einnig möguleika á að færast út í sjó.

Sveinn Guðmundsson verkfræðingur kynnti svipaða hugmynd fyrir fjórum árum, að lengja austur-vesturbrautina út í Skerjafjörð, en vildi þó að stutt norður-suður braut yrði alfarið á uppfyllingu á Skerjafirði út af Ægissíðu.

Fyrir áratug lét borgarráð Reykjavíkur gera sérstaka úttekt á annarskonar útfærslu; að austur-vestur braut verði lögð út í Fossvog og Skerjafjörð þvert á norður-suðurbrautina. Borgarverkfræðingur áætlaði að þannig flugbraut á uppfyllingu myndi kosta 4,8 milljarða króna, sem á verðlagi í dag jafngildir tíu milljörðum króna, en á móti kæmu 75 hektarar lands til annarra nota.

Gísli Halldórsson, arkitekt og fyrrverandi forseti borgarstjórnar, kynnti svipaða hugmynd fyrir áratug, en um minni flugvöll með austur-vestur braut útí Skerjafirði en norður-suðurbrautin yrði færð til aðeins vestar og stefnu hennar örlítið breytt.

Róttækasta tillagan um flugvöll á Skerjafirði birtist þó sennilega í kvikmynd Hrafns Gunnlaugssonar, Reykjavík í öðru ljósi, fyrir tólf árum, þegar hann myndgerði hugmynd Trausta Valssonar skipulagsfræðings um að flytja flugvöllinn alfarið út á Löngusker og hafa hann nægilega stóran til að hann gæti einnig tekið við millilandafluginu.