Vegagerð liggur að mestu niðri á Íslandi

Tvö verk í vegagerð hafa stöðvast vegna gjaldþrots KNH-verktaka á Ísafirði. Vegagerð í landinu liggur nú að mestu niðri og eru aðeins þrjú smáverk í gangi á öllu landinu.

Lagning vegar um Skálanes á sunnanverðum Vestfjörðum var meðal þess sem KNH-verktakar áttu eftir að ljúka þegar fyrirtækið var tekið til gjaldþrotaskipta í síðasta mánuði. Þar áttu verklok raunar að vera 1. nóvember 2011, en nú þarf vegagerðin að leita nýrra leiða til að klára verkið.

Sama á við um síðasta áfanga Vopnafjarðarleiðar, svokallaða millidalaleið milli Vesturárdals og Hofsárdals, það verk hefur einnig stöðvast vegna gjaldþrots KNH.

Samkvæmt upplýsingum vegamálastjóra er nú rætt um að bjóða síðustu verkþætti út að nýju eða semja við þrotabúið um að fá undirverktaka til að taka við öðru verkinu eða báðum. Markmiðið sé þó að ljúka þeim báðum næsta sumar.

Brottfall þessara tveggja verka þýðir að nú eru aðeins unnið í þremur smáverkum í vegagerð á Íslandi, það stærsta eru gatnamót við Straumsvík, en hin tvö eru smíði tveggja brúa á Vestfjörðum, önnur er í Álftafirði en hin í Steingrímsfirði.