EES-ríkin fljót að innleiða tilskipanir

EES-ríkin þrjú, Ísland, Liechtenstein og Noregur, eru í hópi þeirra ríkja sem fljótust eru að lögfesta reglur um innri markað Evrópusambandsins (ESB). Eru ríkin hluti af markaðnum samkvæmt EES-samningnum.

Eftirlitsstofnun EFTA gefur tvisvar á ári út skýrslu um frammistöðu ESB- og EES-ríkja þegar kemur að innleiðingu tilskipana um innri markaðinn. Nýjasta skýrslan tekur til allra tilskipana sem EES-ríkjunum bar að hafa lögfest 31. október síðastliðinn en skoðunin miðaðist við stöðuna 10. nóvember.

Í skýrslunni kemur fram að innleiðingarhalli Íslands helmingaðist á milli kannana. Voru einungis 0,5 prósent tilskipana ólögfestar þegar athugunin var gerð samanborið við 0,9 prósent áður. Sama hlutfall hjá Noregi var 0,6 prósent og 0,4 prósent hjá Liechtenstein.

Þá kemur fram í skýrslunni að fjöldi tilskipana sem Ísland á eftir að lögfesta jókst nokkuð milli athugana, fór úr 6 í 17. Þá hefur ein tilskipun enn ekki verið lögfest þrátt fyrir að rúm tvö ár séu síðan svo bar að gera.

- mþl