SUS vill afnema bann við fíkniefnum

Samband ungra sjálfstæðismanna (SUS) telur að refsistefna sú sem rekin hefur verið í fíkniefnamálum hérlendis hafi beðið algert skipbrot og því eigi að afnema eigi bann við fíkniefnum.

Í tilkynningu frá SUS segir að á sama tíma og refsingar í fíkniefnamálum hafa verið þyngdar þá hefur neysla á fíkniefnum aukist. Jafnframt hafa samfélagsleg vandamál tengd fíkniefnaneyslu aukist, svo sem glæpir og heilbrigðisvandamál. Góður árangur hefur hins vegar náðst í því að minnka drykkju og reykingar unglinga án þess að grípa hafi þurft til banna og refsinga.

„Ungir sjálfstæðismenn vilja standa vörð um sjálfsákvörðunarrétt einstaklinga. Með afnámi fíkniefnabanns yrði fótunum kippt undan undirheimahagkerfi sem veltir tugum milljarða árlega. Að sama skapi myndu erlend glæpagengi strax missa áhuga á því að koma upp starfsemi á Íslandi. Jafnframt myndi þetta koma neyslunni upp á yfirborðið sem myndi auðvelda eftirlit og hjálpa þeim sem eiga um sárt að binda vegna neyslunnar," segir í tilkynningu SUS.