Sendiherra bannað að mæta á ráðstefnu Framsóknarflokksins

Utanríkisráðuneyti Kanada hefur sent frá sér tilkynningu þar sem segir að Alan Bones sendiherra Kanada á Íslandi muni ekki mæta á ráðstefnu Framsóknarfélags Reykjavíkur í dag. Né muni hann ræða frekar um málefnið sem þar er til umfjöllunnar, það er möguleikana á að skipta krónunni út fyrir kanadadollarann.

Fjallað er um málið á vefsíðu blaðsins Toronto Star. Þar segir að viðtal Alan Bones við fréttastofu í gærmorgun hafi valdið diplómatískri uppákomu í utanríkisráðuneytinu í Ottowa sem síðan hafi sent frá sér tilkynningu sem banni Bones að mæta á ráðstefnuna.

Í viðtalinu kom m.a. fram að samkvæmt viðræðum Bones við ráðamenn í Seðlabanka Kanada væri bankinn jákvæður gagnvart áhuga Íslendinga á að taka upp dollarann og væri tilbúinn í formlegar viðræður um slíkt.

Í tilkynningu utanríkisráðuneytisins segir að ráðuneytið tjái sig ekki opinberlega um gjaldmiðilsmál í öðrum löndum. Haft er eftir Ian Trites talsmanni ráðuneytisins að þetta sé mál íslenskra stjórnvalda og íslensku þjóðarinnar.

Toronto Star ræðir einnig við Sigmund Davíð Gunnlaugsson formann Framsóknarflokksins um málið. Sigmundur bendir á að margt sé líkt með löndunum tveimur og að fjöldi fólks af íslenskum ættum búi í Kanada.

Doug Porter, aðalhagfræðingur BMO Capital Markets, segir að kostnaður Kanadamanna við að leyfa Íslendingum að taka upp Kanadadollarnn sé minniháttar. Íbúafjöldi Íslands sé aðeins 1% af íbúafjölda Kanada.

Portir segir að Kanadamenn eigi að líta á áhuga Íslendinga sem mikil meðmæli. „Ég veit að flestir telja Ísland vera glatað dæmi en landið er að byrja að snúa aðstæðum sér í hag," segir Porter.