Stórhýsi rís í Bolungarvík

Fjögurra hæða íbúðablokk er nú í smíðum í Bolungarvík sem er stærsta hús sem þar hefur risið í á þriðja áratug.

Í bæjarfélagi þar sem íbúum fækkaði um þrjátíu prósent á síðustu þrjátíu árum, úr nærri 1.300 manns niður fyrir 900, þykir það sæta tíðindum að byggingarkrani skuli kominn á loft. Við Aðalstræti, aðalgötu bæjarins, hófu Vestfirskir verktakar í haust að smíða 15 íbúða hús fyrir Félag eldri borgara í Bolungarvík upp á 1.720 fermetra.

Húsið verður fjögurra hæða, en með geymslum og sameiginlegu rými á neðstu hæð. Byggingarfulltrúi bæjarins segir að svo stórt hús hafi ekki verið smíðað í Bolungarvík síðan 1989.

Sextán manns starfa hjá Vestfirskum verktökum og þeir segjast hafa haft í nógu að snúast, einkum í smærri viðhaldsverkum. Garðar Sigurgeirsson, húsasmíðameistari hjá Vestfirskum verktökum, segir í viðtali í frétt Stöðvar 2 að kreppan hafi kannski aldrei komið til Vestfjarða. Þeir hafi haft nóg að gera og útlitið sé bjart.

Þess má geta að á síðasta ári fjölgaði íbúum Bolungarvíkur um einn, úr 865 upp í 866.