Fatlaðir fjölmenna til London | Annasamasti dagurinn á Heathrow

Ólympíumót fatlaðra verður sett í London næstkomandi miðvikudag. Reiknað er með yfir 2000 keppendum og starfsfólki á Heathrow-flugvöllinn í London í dag sem verður að öllum líkindum sá annasamasti á flugvellinum í aðdraganda leikanna.

„Það var tekið vel á móti okkur hér á Heathrow og nóg af aðstoðarfólki," sagði Ástralinn Colin Harrison í samtali við Guardian við komuna til Englands. Harrison, sem er 51 árs og keppir í siglingum á mótinu, missti aðra hönd sína eftir baráttu við krabbamein þegar hann var 28 ára.

Reiknað er með komu um 400 keppenda í hjólastólum á flugvöllinn í dag. Settar hafa verið upp sérstakar lyftur og önnur hjálpartæki keppendunum til aðstoðar. Einnig mæðir mikið á flugfélögunum að flytja stóra hópa íþróttafólksins til London.

British Airways flytur keppendur frá 25 löndum, þar á meðal keppendur Breta sem dvalið hafa erlendis við æfingar. Ásamt keppendunum flytur flugfélagið um 300 hjólastóla auk annars íþróttabúnaðar.

„Þetta hefur verið rosalega flókið verkefni sem við höfum undirbúið frá því í Peking 2008 þegar við flugum heim með keppendur Bretlands á Ólympíuleikunum og Ólympíumótinu," segir Andy Lord hjá flugfélaginu British Airways.

„Það er heiður að flytja þúsundir íþróttamanna, þjálfara þeirra og búnað til London í aðdraganda Ólympíumótsins. Við reynum að fylgja á eftir vel heppnaðri þjónustu okkar á Ólympíuleikunum," segir Lord.

Keppendur Íslands, þau Helgi Sveinsson, Matthildur Ylfa Þorsteinsdóttir, Kolbrún Alda Stefánsdóttir og Jón Margeir Sverrisson, fljúga utan á laugardagsmorgun.