Fertugur maður lét lífið í eldsvoða í Ólafsvík

Tæplega fertugur karlmaður lét lífið í eldsvoða í litlu einbýlishúsi í Ólafsvík í nótt.

Nágranni tilkynnti slökkviliði um að hann sæi glóð inn um glugga í húsinu á þriðja tímanum í nótt og var mikill hiti og reykur í húsinu þegar slökkvilið kom á vettvang.

Reykkafarar fundu húsráðanda, sem var einn í húsinu, báru hann strax út og hófu lífgunartilraunir. Jafnfarmt var kallað eftir þyrlu Landhelgisgæslunnar, sem send var af stað, en skömmu síðar var maðurinn úrskurðaður látinn.

Greiðlega gekk að slökkva eldinn, en eldsupptök eru ókunn. Rannsóknarlögreglumenn frá lögreglunni á höfuðborgarsvæðinu munu aðstoða lögreglu á staðnum við rannsókn málsins.