Snorri vill aftur í Brekkuskóla

Snorri Óskarsson, forstöðumaður Hvítasunnusafnaðarins á Akureyri, stefnir á að fara aftur að kenna í Brekkuskóla. Hann var sendur í leyfi frá störfum á dögunum eftir að foreldrar barna kvörtuðu undan skrifum hans um samkynhneigða á bloggsíðu. Snorri var jafnframt kærður til lögreglu fyrir ummæli sín en lögreglan vísaði kærunni frá í dag.

„Það stendur allt til þess. Beina brautin liggur þangað," sagði Snorri þegar hann var spurður að því í þættinum Reykjavík síðdegis í dag hvort hann hygðist snúa aftur í Brekkuskóla. Hann segir að engin ákvörðun verði tekin um framtíð hans fyrr en í ágúst.

„Mér skilst að það sé vegna þess að maðurinn átti ekki aðild að málinu," sagði Snorri um ástæður þess að kærumálið hafi verið látið niður falla. „Annað hvort verður þú að vera vottur að, eða þolandi að máli til að hægt sé að kæra," segir Snorri. Hann segist heldur ekki vera viss um að samkynhneigður aðili geti stefnt sér vegna þess að hann hafi ekki beint orðum sínum að neinni persónu. „Þetta var bara málefni sem ég var að ræða um og ég er ekki viss um að það sé hægt að kæra út af því. En það er hægt að reyna það," segir Snorri Óskarsson.