Fréttastjóri DV yfirheyrður vegna FME-málsins

Ingi Freyr Vilhjálmsson, fréttastjóri DV, er einn þriggja sakborninga sem yfirheyrðir voru í dag vegna kæru Fjármálaeftirlitsins til lögreglunnar á höfuðborgarsvæðinu á hendur Gunnari Andersen, fyrrverandi forstjóra stofnunarinnar. Þetta kemur fram á DV.is í dag. Auk hans var Gunnar sjálfur yfirheyrður og einn til viðbótar.

Friðrik Smári Björgvinsson, yfirlögregluþjónn hjá lögreglunni á höfuðborgarsvæðinu, segir að yfirheyrslum yfir þremenningunum sé lokið í dag. Hann býst ekki við því að rannsókn málsins haldi áfram fyrr en á mánudag.

Á DV.is kemur fram að Inga Frey sé gefið að sök að hafa rofið bankaleynd með fréttaskrifum af málum Guðlaugs Þ. Þórðarsonar alþingismanns.