Flutningsbíll fullhlaðinn fiski valt skammt frá Ólafsvík

Ökumaður á stórum flutningabíl með tengivagni, slapp með skrámur þegar bíllinn og vagninn ultu út af þjóðveginum austan við Ólafsvík laust fyrir miðnætti og höfnuðu á hvolfi.

Hann var fluttur á heilsugæslustöðina í Ólafsvík en útskrifaður að skoðun lokinni. Þrettán kör, full af ferskum fiski, voru á bílnum og vagninum og dreifðist hann um vettvanginn þar sem flutningahúsin á bílnum og vagninum brotnuðu í spón.

Að sögn lögreglu var flughálka þegar þetta gerðist og er það talin orsökin. Flokkur manna vann fram eftir nóttu við að ná fiskinum upp í körin aftur, og bíllinn, sem talinn er ónýtur, verður hífður upp á veginn í dag.