Söfnuðu rúmlega 60 milljónum fyrir bágstadda

Hjálparstarf kirkjunnar safnaði 61 milljón krónur í gegnum frjáls framlög almennings, samtaka og fyrirtækja í desember og janúar síðastliðinn. Féð rennur til neyðarhjálpar neyðarhjálpar á hungursvæðum Austur-Afríku og til innanlandsaðstoðar samkvæmt tilkynningu frá kirkjunni.

Fjármunirnir eru m.a. notaðir til að mæta brýnustu þörfum fólks sem býr við hrikalegar aðstæður á þurrkasvæðum og í flóttamannabúðum í Austur-Afríku.

Hjálparstarfið er einnig með fjölbreytta aðstoð á Íslandi. Mataraðstoð er veitt með inneignarkortum í matvöruverslunum, veitt er fjármálaráðgjöf, stuðningur vegna lyfjakostnaðar og skólagöngu barna og ungmenna ásamt einstaklings- og fjölskylduráðgjöf.

Frá því að inneignarkortin voru tekin upp í maí sl. og út árið 2011 hafa 1.200 einstaklingar og fjölskyldur fengið afgreidd kort. Þar sem um 3 einstaklingar eru að meðaltali á bak við hverja umsókn eru það um 3.600 einstaklingar sem nutu aðstoðar. Á sama tímabili fengu 1.815 aðra aðstoð en mataraðstoð.

Hjálparstarf kirkjunnar færir öllum bestu þakkir fyrir stuðninginn.