SFÞ Skora á ríkisstjórn að lækka álögur á eldsneyti

Samtök ferðaþjónustunnar skora á ríkisstjórnina að lækka álögur hins opinbera á eldsneyti samkvæmt tilkynningu frá samtökunum. Þar segir að ríkissjóður taki nú til sín um helming útsöluverðs á díselolíu í formi skatta eða um 125 krónur af hverjum seldum lítra.

Hópbifreiðar á landinu nota 12 milljón lítra af olíu á ári sem kosta nú á ársgrundvelli 3 milljarða króna samkvæmt upplýsingum samtakanna. Ríkið fær til sín u.þ.b. 1.500 milljónir af þeirri upphæð og hefur það aukist um 300 milljónir á milli ára sem er aukning um 25% á einu ári.

Jeppabifreiðar, snjósleðar, bátar og fleiri farartæki, sem notuð eru í ferðaþjónustu, búa við sömu hækkanir.

Á síðastliðnu sumri fækkaði ferðum Íslendinga um landið, sérstaklega á þeim svæðum sem eru lengst frá stærstu markaðssvæðum s.s. höfuðborgarsvæðinu. „Útlitið er því ekki bjart fyrir ferðaþjónustufyrirtækin víðs vegar um landið sem helst þjóna Íslendingum," segir svo í tilkynningunni.

Lækkun á álögum ríkisins myndi létta undir með ferðaþjónustufyrirtækjunum um land allt og stuðla að auknum ferðum fólks um landið að mati samtakanna.