Á ekki að afturkalla ákæruna "af því bara"

Valgerður Bjarnadóttir, formaður nefndar sem fjalla á um frumvarp um afturköllun ákæru á hendur Geir H. Haarde fyrrverandi forsætisráðherra, sagði á Alþingi í dag að ekki væri hægt að fella málið gegn Geir niður „af því bara". Nefndin vill vísa frumvarpi Bjarna Benediktssonar frá.

Hún sagði að ákæruvaldið, Alþingi í þessu tilviki, ætti að byggja á málefnalegum sjónarmiðum þegar saksókn er felld niður. Málið væri nokkuð einfalt, það væru engar málefnalegar ástæður til að draga málið til baka.

Þá sagði hún að ýmsir sérfræðingar á lagasviðinu hefðu bent á að Alþingi væri ekki bannað að grípa inn í málið. Það væri þó ekki alltaf þannig, þó að Alþingi megi þá eigi það ekki að draga málið til baka þegar það er komið fyrir dóm.

Meirihlutinn í nefndinni leggur til að málinu verði vísað frá, „ekki vegna þess að nefndin vilji ekki taka efnislega afstöðu í málinu, heldur vegna þess að fólk á ekki alltaf að gera það sem má," sagði Valgerður.

Bjarni Benediktsson benti á að margir þingmenn hefði breytt um skoðun frá því að málið var fyrst tekið fyrir. Þess vegna ætti að afturkalla ákæruna.