Kornungur heimsmeistari teflir á Skákhátíð

Hou Yifan heimsmeistari kvenna verður í aðalhlutverki þegar Skákhátíð Reykjavíkur 2012 hefst í Sjóminjasafninu við Grandagarð í dag klukkan 15.

Á þriðjudaginn hefst N1 Reykjavíkurskákmótið í Hörpu, þar sem skærustu stjörnur skákheimsins og skákmenn frá 40 löndum berjast um sigur á einu elsta og virtasta skákmóti heims.

Þar verður hin kornunga kínverska stúlka meðal keppenda og er líkleg til að verða fyrst kvenna til að sigra í næstum hálfrar aldar sögu mótsins.

Hou Yifan heimsmeistari kvenna er nýorðin 18 ára. Hún varð heimsmeistari aðeins 15 ára, yngst allra í skáksögunni, bæði karla og kvenna.

Hún varð í janúar í efsta sæti á skákmóti á Gíbraltar þar sem 55 stórmeistarar voru meðal keppenda.